Собранието денеска ќе одржи седница на која пред пратениците ќе се најдат повеќе законски предлози и национални програми што се однесуваат на јавната администрација, високото образование, науката и други области.
На 125. седница, по скратена постапка, ќе се разгледуваат предлог-измени на законите за високи раководители, административни службеници, вработените во јавниот сектор, платите и другите надоместоци на избраните и именуваните лица, како и измените на Законот за шумите.
На дневниот ред е и Предлог-законот за изменување на Законот за надворешни работи, кој ќе биде разгледан во прво читање.
Покрај законските решенија, пратениците ќе расправаат и за Предлог Националната програма за високото образование за периодот 2025–2030 година, како и за Предлог Националната програма за научно-истражувачка дејност за истиот период, кои содржат мерки за развој на овие области во наредните години.
