Судската пресуда во која претседателот на сега веќе бившиот културен клуб „Ванчо Михајлов“, Љупчо Георгиевски е осуден на една година условен затвор, за ВМРО-Народна партија претставува враќање на вербалниот деликт со кој масовно се казнуваа граѓаните во комунистичка Југославија.
Според партијата, тоа претставува недемократски чин со кој се застрашуваат граѓаните на Македонија да размислуваат и зборуваат по нивното слободно уверување и убедување. Народна тврди дека тоа е и удар врз македонската историја преку обид за судење на „историската улога на Ванчо Михајлов за што не се дрзнала ни комунистичка Југославија“.
-Оваа судска одлука ја демонстрира и хипокризијата на македонскиот правосуден систем со оглед на фактот дека масовно на српските одбележувања на битките кај Зебрњак, Брегалничката битка, Денот на победата во Битола, како и Валандовското востание, српските претставници го употребуваат терминот ‘Јужна Србија’, ‘Стара Србија’ или ‘ослободување на Србите во Македонија’, велат од ВМРО-Народна.
Оттаму велат дека ваквата одлука би требало да има и понатамошни правни последици со оглед на тоа дека во статутот на владејачката партија ВМРО-ДПМНЕ јасно е утврден континуитетот со трите конгреси на ВМРО под водство на Ванчо Михајлов.
