Со 64 гласа „за“, без ниту еден глас „против“ или „воздржан“, Собранието попладнево го усвои дополнетиот ребаланс на Буџетот на Република Македонија за 2026 година.
Од владејачката коалиција оценија дека измените се насочени кон економска стабилност, развој и одговорно управување со јавните финансии, додека опозицијата смета дека ребалансот не носи продуктивен развој и не одговара на реалните потреби на граѓаните.
Министерката за финансии Гордана Димитриеска-Кочоска во образложението пред пратениците истакна дека ребалансот претставува навремено усогласување на буџетските проекции со новите економски услови и обезбедување средства за законските обврски и развојните приоритети.
Според неа, со усвојувањето на ребалансот продолжува инвестицискиот циклус, реализацијата на инфраструктурни проекти, поддршката за локалниот развој, како и создавањето услови за поголема сигурност за граѓаните и стопанството.
Од опозицијата, пак, пристигнаа критики за економската политика на Владата. Пратеникот Фатмир Битиќи од СДСМ рече дека неговата партија ќе го поддржи ребалансот, но побара Владата да гарантира навремена исплата на субвенциите за земјоделците.
Битиќи посочи дека со ребалансот дефицитот достигнува 46,2 милијарди денари и оцени дека првичните буџетски проекции не ги дале очекуваните резултати.
Тој предупреди на намалување на приходната основа, раст на задолжувањето и донациите, како и на слабата реализација на капиталните расходи. Според него, државата полесно реализира тековно трошење отколку развојни инвестиции.
Од владејачкото мнозинство, пак, одговорија дека ребалансот е подготвен со цел зачувување на финансиската стабилност и продолжување на економскиот раст.
Со дополнетиот ребаланс, вкупните приходи се планирани на 379,5 милијарди денари, што е зголемување од 1,2 проценти во однос на првичниот Буџет. Расходите се зголемуваат на 425,8 милијарди денари, односно за 2,8 проценти повеќе од првичните проекции.
Буџетскиот дефицит е проектиран на 46,3 милијарди денари, што претставува 4,1 процент од бруто домашниот производ.
