Поради врнежи од снег, утрово во 05:15 часот е воведена забрана за сообраќај на тешки товарни возила на патниот правец Струга – ГП Ќафасан.
Од АМСМ информираат дека сообраќајот на државните патишта се одвива во зимски услови, по претежно влажни коловози. Врнежи од снег со променлив интензитет се регистрирани во Куманово, Страцин, Крушево и Железнец, како и на планинските превои Стража, Буково, Ѓавато и Пресека. Засега, снегот не претставува сериозна пречка за одвивање на сообраќајот.
Интензитетот на сообраќај надвор од градските средини е умерен, а на граничните премини од македонска страна нема подолги задржувања за влез и излез од државата.
Од 10:00 часот денеска, на ГП Ники (Меџитлија) ќе биде воведена забрана за движење на товарни возила, која ќе трае 48 часа, односно до 10 јануари во 10:00 часот. Сообраќајот за патнички возила ќе се одвива без ограничувања.
ЈП Македонијапат информира дека на магистралниот пат А3 Битола – Ресен, кај самиот влез во Ресен, поради обилни врнежи од дожд и можност од излевање на Голема Река, се препорачува исклучително внимателно управување со возилата. Иста препорака важи и за патниот правец Царев Двор – Стење, каде постои ризик од излевање на локални реки.
Во сила останува законската обврска за задолжително поседување зимска опрема. АМСМ апелира на прилагодена брзина, почитување на сообраќајната сигнализација и зголемена внимателност, особено на делниците Катланово – Велес, Маврово – Дебар – Струга, Виница – Берово и Кочани – Делчево, каде постои опасност од одрони.
