Седмото издание на Скопскиот градски фестивал ќе се одржи од 18 до 26 септември со програма посветена на музичкиот и културниот дијалог меѓу Македонија и земјите од регионот. На фестивалот, во организација на Баги Комуникации, ќе настапат уметници од Македонија, Словенија, Албанија, Грција, Црна Гора и Бугарија.
Програмата ги поврзува џезот, класичната музика, современото авторско творештво и музичкото наследство на Балканот, а дел од проектите се создадени специјално за фестивалот. Меѓу гостите е словенечкиот саксофонист и композитор Васко Атанасовски, кој ќе настапи заедно со Profundus.
Посебен проект ќе ги обедини македонскиот контрабасист Мартин Ѓаконовски, албанскиот пијанист и композитор Гент Руши и грчкиот хармоникаш Танос Ставридис, кои подготвуваат заедничко дело што премиерно ќе биде изведено во Скопје.
Пијанистката Милјана Николиќ ќе го претстави проектот „Балкански композитори“, посветен на современите автори од регионот, а самостоен настап ќе има и македонскиот гитарист и мултиинструменталист Мухамед Ибрахими.
Виолончелистот Антонио Илиоски и бугарската пијанистка Јана Василева Лолова ќе одржат концертна промоција на албумот „Beyond The Silence“.
На 20 септември на летната сцена „Лепеза“ во Градскиот парк ќе настапи и младата скопска група „Фрекфенција“, составена од ученици од основно училиште. Фестивалските концерти се предвидени во камерната сала на Македонската филхармонија, со програмски исклучок за настапот на „Фрекфенција“ на сцената „Лепеза“.
Скопскиот градски фестивал е основан во 2021 година, а во досегашните шест изданија обединил повеќе од 100 уметници од Македонија и регионот и иницирал повеќе премиерни проекти и нови уметнички соработки.
