Претседателката Гордана Сиљановска-Давкова денеска ја посети Струга, на денот кога се одбележуваат 25 години од потпишувањето на Охридскиот рамковен договор.
Таа оствари средба со градоначалникот на Струга, Менди Ќура, кој е независен кандидат поддржан од граѓани со различна партиска, етничка и верска припадност.
Сиљановска-Давкова оцени дека Ќура има можност да води локална политика која ќе ги обединува граѓаните и ќе биде насочена кон решавање на нивните реални проблеми.
„Симболично, денеска, на 25-годишнината од потпишувањето на Рамковниот договор, ја посетив Струга и разговарав со градоначалникот Менди Ќура, независен кандидат, поддржан од стружани со различна партиска, етничка и верска припадност. Тој има шанса да води локална политика што обединува, водејќи сметка за сите граѓани“, напиша претседателката.
На средбата таа била информирана за тековните активности во општината, но и за најголемите предизвици со кои се соочува Струга.
Како особено важна ја издвојува потребата во следните пет години да се искористи довербата и шансата што, според неа, ја има регионот со статусот под заштита на УНЕСКО.
Сиљановска-Давкова разговарала и со претседателот на Советот на Општина Струга, Мите Стефоски, при што оценила дека локалното раководство е подготвено да преземе конкретни мерки за заштита на природното и културното наследство.
„Разговорот со градоначалникот Ќура и со претседателот на Советот на Општината, Мите Стефоски, ме уверува во нивната подготвеност за решавање на реалните проблеми на граѓаните, како и за преземање сериозни мерки за отстранување на заканите за природното и културно наследство под заштита на УНЕСКО“, порача претседателката.
Таа нагласи дека Струга, Охрид, Охридското Езеро и целиот регион претставуваат заедничко богатство и заслужуваат посветеност и грижа и од локалните и од државните институции.
