Најмалку седум лица загинаа откако патничкиот брод „Filo Jet“ со 267 лица се преврте недолго по испловувањето од пристаништето Гирне на северот на Кипар. Според последните информации, спасени се 237 лица, додека по 23 патници и натаму интензивно се трага. Големата операција за пребарување и спасување продолжува со четири пловила на крајбрежната стража на Северен Кипар, пет пловила на турската крајбрежна стража, еден цивилен патнички брод и два хеликоптера.
Властите соопштија дека најголем предизвик е да се стигне до луѓето кои можеби останале заробени во превртениот катамаран. Лидерот на кипарските Турци, Туфан Ерхурман изјави дека спасувачите користат и дополнителна технологија во обидот да ги лоцираат исчезнатите. Премиерот Унал Устел порача дека во овој момент „единствен приоритет е човечкиот живот“ и дека се ангажирани сите расположливи ресурси. Временските услови засега им одат во прилог на спасувачите, бидејќи видливоста е добра, а температурата на морето е доволно висока за хипотермијата да не претставува непосредно најголема опасност.
Бродот со 259 патници и осум членови на екипажот испловил кон турското пристаниште Ташуџу, но само неколку километри од брегот почнал да прима вода и се превртел. Причината за несреќата засега не е утврдена, а според достапните снимки временските услови на морето не изгледале лоши за сами да предизвикаат превртување на бродот. Океанографот Сајмон Боксал како една од можностите ја посочи веројатноста катамаранот да удрил во предмет во морето, како контејнер паднат од товарен брод, иако за тоа засега нема потврда. Како друга можна причина се споменува неправилно распоредениот товар, но Боксал оценува дека таквото сценарио е помалку веројатно.
Компанијата „Filo Denizcilik“, која управува со бродот, соопшти дека е длабоко потресена од трагедијата и дека веднаш ги ставила своите ресурси на располагање на спасувачките екипи. За семејствата и роднините на патниците е отворена и посебна телефонска линија преку која можат да добијат информации. Спасувачите продолжуваат со потрагата по 23-те исчезнати, при што главната надеж е дека дел од нив можеби сè уште се живи и заробени во превртениот брод.
