Македонија го прекина долгиот голгетерски пост, но не успеа да освои бодови на гостувањето кај Шкотска, откако загуби со 2:1 во Лигата на нациите.
Селекторот Гоце Седлоски по натпреварот изјави дека смета оти клучниот момент на средбата бил одлуката донесена по интервенција на ВАР системот, кога на домаќинот му беше досуден пенал.
Од белата точка Шкотска го постигна вториот погодок и стигна до победата, а Седлоски смета дека без таа одлука исходот можел да биде поинаков.
„ВАР го реши мечот и победата на Шкотска. Не можам да им замерам ништо на момците. Она што го договоривме пред натпреварот, го исполнивме на теренот. Мислам дека се претставивме во добро издание и дека поразот не го заслуживме, но честитки до Шкотска за трите бода“, изјави Седлоски.
Македонските фудбалери успеаја да постигнат гол по пауза од 844 минути игра, но и покрај подоброто издание, од Глазгов се враќаат без освоен бод.
