СДСМ ја обвини Владата дека со политичката реторика повторно создава тензии во пресрет на најавените разговори со Бугарија, оценувајќи дека изјавите од власта не придонесуваат за напредок во европскиот процес.
Од опозициската партија се повикаа на ставовите на претседателката на Европската комисија, Урсула фон дер Лајен, која порача дека македонскиот идентитет и јазик се заштитени во рамки на европскиот процес.
Според СДСМ, пораката од Брисел е јасна – на маса се реформите, европското обвинителство и уставните измени, но нема нова преговарачка рамка, нови услови или дополнителни гаранции.
„Македонскиот идентитет е заштитен. Јазикот е заштитен. На маса се реформите, европското обвинителство и промена на Уставот. Нема нови услови. Нема нова преговарачка рамка, нема гаранции“, наведуваат од СДСМ.
Партијата оцени дека нема основа за најавите поврзани со поништување на Преспанскиот договор или враќање на старото име на државата, посочувајќи дека таквите пораки биле дел од политичките настапи на премиерот Христијан Мицкоски пред и по доаѓањето на власт.
СДСМ ја критикуваше и реториката на премиерот пред најавената средба со Бугарија, на која, според партијата, треба да учествува министерот за надворешни работи Тимчо Муцунски.
„Пред заминувањето на Тимчо Муцунски на средба следната недела, Мицкоски зборува за капитулација на фашистичка Бугарија и за окупација на територијата на денешна Македонија во Втората светска војна“, наведуваат од опозициската партија.
Од СДСМ сметаат дека ваквиот пристап ја зголемува политичката напнатост и не создава услови за изнаоѓање решение со Софија.
Партијата се осврна и на изјавата на Мицкоски дека со Бугарија „се разговара, а не се преговара“, оценувајќи дека таквата позиција не води кон конкретен резултат.
„Не зборува за решение. Зборува за да не може ниту да се седне на масата“, стои во соопштението.
Од СДСМ додаваат дека не ги оспоруваат историските прашања, но сметаат дека нивното разгледување треба да биде работа на историчарите, додека институциите треба да се насочат кон реформите и напредокот кон Европската Унија.
