Складиште на Фондацијата на Олена Зеленска во Киев е целосно уништено во руски напад, а во пожарот изгорела целата хуманитарна помош што се наоѓала во објектот. Од Фондацијата соопштија дека во нападот нема повредени и им се заблагодарија на украинските служби за итни интервенции за брзата реакција.
Во складиштето се чувала помош набавена или добиена од партнери, која требало да биде распределена на деца, семејства и институции низ Украина.
Во пожарот биле уништени генератори, апарати за домаќинство, лаптопи, таблети, електронски читачи и медицинска опрема. Опремата била наменета за поддршка на образованието, училиштата и болниците, како и за помош на семејствата во различни делови од земјата.
Во текот на истата ноќ руски дронови погодиле и други магацински простории во Киев, во кои се чувала опрема на продукциското студио „Квартал 95“.
