Родителите на загинатите во пожарот во дискотеката „Пулс“, заедно со голем број граѓани, денеска по 49. пат маршираа низ улиците на Кочани во чест на своите најблиски кои трагично ги загубија животите на 16 март минатата година.
Во рацете носеа транспаренти во форма на срце со имињата на сите жртви, а на кружниот тек на булеварот „Стево Теодосиевски“ запалија свеќи, одбележувајќи точно година и половина од трагедијата.
За разлика од претходните маршеви, овој пат родителите имаа едно заедничко обраќање пред Основниот суд во Кочани. Најголемо незадоволство изразија поради тоа што наскоро му истекува законскиот рок на притвор на сопственикот на дискотеката „Пулс“, Дејан Јованов, како и поради информациите дека била понудена гаранција во имот за негово евентуално ослободување.
Во име на семејствата зборуваше Валентина Христовска, мајка на починатиот Павел Христовски.
„Само два дена пред овој марш слушнавме од одбраната дека притворот не можел да продолжи, освен ако не се измисли ново кривично дело. Во исто време се нуди имот како гаранција за негово излегување од притвор. Но, кој им ја гарантираше безбедноста на нашите деца кога влегоа во ‘Пулс’?“, праша Христовска.
Таа нагласи дека семејствата бараат целосно да се испитаат сите околности поврзани со работењето на дискотеката – од реконструкцијата и пренамената на објектот, преку издавањето на лиценцата, до инспекциските контроли, финансиското работење, организацијата на концертот, внесувањето пиротехника и капацитетот на објектот.
Родителите истакнаа дека не бараат тие да одлучуваат кој ќе биде во притвор, туку судот да постапува исклучиво според законот и доказите.
„Бараме законот да биде гаранција дека ниту еден пропуст нема да остане непроверен, ниту една незаконитост премолчена и ниту една одговорност неиспитана“, порача Христовска.
Во своето обраќање таа истакна дека семејствата нема да престанат да ја бараат вистината и одговорноста.
„Нашите деца денес не можат да зборуваат. Ние сме нивниот глас. И додека не ја добиеме целата вистина, тој глас нема да замолкне“, рече Христовска.
Маршот започна од Паркот на Револуцијата, продолжи преку мостот кај Трговскиот центар, а учесниците застанаа и пред зградите на Управата за јавни приходи и Полициската станица, од каде повторно побараа правда за жртвите и целосно расчистување на трагедијата.
