Американскиот републикански конгресмен Џо Вилсон упати остри критики кон српскиот претседател Александар Вучиќ поради врските на Србија со Русија, Кина и Иран. Критиките ги изнесе на сослушување на Поткомитетот за Европа на Претставничкиот дом посветено на американската политика и безбедносните предизвици на Западен Балкан, на кое сведочеше заменик-помошникот државен секретар Даниел Лотон.
Вилсон посочи на руското учество во српската нафтена индустрија и на воената и надзорната технологија набавена од Кина, оценувајќи дека Белград одржува блиски односи со американските противници. Лотон одговори дека Вашингтон сака да биде „партнер од прв избор“ за Србија и другите држави од Западен Балкан и посочи на напорите за отстранување на руското сопствеништво и контрола врз НИС.
Вилсон го отвори и прашањето за изборите во Србија на 25 октомври, тврдејќи дека постојат индиции за подготовки за изборни манипулации. Тој праша каков би бил одговорот на Вашингтон доколку дојде до ограничување на слободата на говор и собирање или нерегуларности во изборниот процес. Лотон рече дека Стејт департментот внимателно ги следи подготовките за изборите, но не најави конкретни санкции или други мерки.
Вилсон и претходно ја критикуваше политиката на Вучиќ кон Москва, Пекинг и Техеран и се залагаше за американски мерки против лица за кои ќе се утврди дека ја поткопуваат демократијата и владеењето на правото во Србија.
