Основното јавно обвинителство Куманово побара определување притвор за 54-годишен маж осомничен дека се заканувал оти ќе ги запали својата ќерка и внука, а потоа истурил две шишиња бензин во семејниот дом.
Против него е поведена постапка за кривично дело „загрозување на сигурноста“, по кривична пријава од СВР Куманово. Од Обвинителството информираат дека станува збор за лице кое веќе е опфатено во судска постапка за телесна повреда на ќерката при семејно насилство.
Според надлежните, насилничкото однесување на осомничениот се повторува, а претходниот напад врз неговата ќерка, за кој веќе е обвинет, бил извршен под дејство на алкохол.
Од Обвинителството посочуваат дека овојпат не станувало збор само за вербални закани, туку и за конкретни дејствија што укажуваат на сериозен ризик.
„Осомничениот не само што упатил закани дека ќе ги запали ќерката и внуката, туку истурил и две шишиња бензин во домот“, наведуваат од Обвинителството.
По пријавувањето на случајот била извршена итна проценка на ризик, при што било утврдено дека постои сериозна опасност по животот и физичкиот и психичкиот интегритет на жртвата и членовите на нејзиното семејство.
Обвинителството оценува дека постои реален ризик од повторување на насилството, но и опасност осомничениот да го реализира заканувањето и да изврши потешко кривично дело.
Поради овие околности, јавниот обвинител смета дека другите мерки не би биле доволни за обезбедување на целта на постапката и до судот доставил предлог за определување притвор.
