На денешен ден пред 81 година во битолската гимназија, за прв пат во едно македонско средно училиште се одржал наставен час на современ македонски јазик.
„На скромно украсената сала на гимназијата се дигна завесата и молк. На бината се појави првиот директор на гимназијата, Орде Печијаре. Тој објави дека гимназијата започнува со редовна настава на македонски јазик. Одекна силен аплауз. Тогаш по прв пат стиховите на Константин Миладинов „Т’га за југ”, „Бисера”, „Голапче”…, како и стиховите на Кочо Рацин и убавиот мелос на македонските народни песни, ги растреперија срцата на присутните”, се нагласува во монографија на гимназијата.
Редовната настава во битолската гимназија ја следеле 572 ученици во 13 паралелки, а првата учебна година завршила на 20 јуни 1945 година.
Битолската гимназија во изминативе децении неколкупати го менувала името, но отсекогаш за битолчани била „Горната Гимназија”.
