По повеќедневните протести на земјоделците, производителите, откупувачите и преработувачите постигнаа договор за повисоки откупни цени на пиперката ајварка. На средба во Струмица беше договорено првата класа да се откупува по 40 денари за килограм, првата и втората класа за преработувачките капацитети по 30 денари, а шкартот по 15 денари за килограм.
Министерот за земјоделство, Борче Серафимовски, оцени дека договорените цени се резултат на заеднички разговори меѓу сите засегнати страни и повика договорот целосно да се почитува. Тој побара од преработувачите реална и објективна класификација на пиперката, од откупувачите навремено да ги информираат производителите за квалитетот и цената, а од земјоделците родот да го предаваат согласно утврдените стандарди.
Според министерот, земјоделците заслужуваат нивниот труд и вложувањата да бидат соодветно вреднувани, а постигнатиот договор треба да обезбеди поправеден откуп во тековната сезона.
Проблемот со ниските откупни цени беше актуелен изминатите денови во Струмичко, каде што производителите на пиперката куртовска капија протестираа против првично понудените 25 денари за килограм за прва класа. Тие предупредуваа дека со таква цена не можат ниту да ги покријат трошоците за производство, кои постојано растат.
Од Месното здружение на млади од Муртино, кое ги организираше протестите, претходно најавуваа продолжување на блокадите доколку не се понуди прифатливо решение. Со новиот договор протестите засега се ставаат во мирување.
Серафимовски најави дека од октомври ќе започнат разговори за системски измени во земјоделството. На маса ќе бидат прашањата за класификацијата на земјоделските производи, роковите за исплата, како и обврските на откупувачите и преработувачите, со цел ваквите проблеми да не се повторуваат секоја година.
Во меѓувреме, незадоволството меѓу земјоделците продолжува и во Пелагонија. Тамошните производители бараат итна исплата на преостанатите субвенции за 2025 година, предупредувајќи дека без тие средства тешко ќе ја започнат есенската производна сезона.
Тие бараат исплатата да заврши до крајот на неделата, а во спротивно најавуваат блокада на граничниот премин Меџитлија. Од Министерството за земјоделство велат дека состојбата внимателно се следи и дека комуникацијата со производителите, откупувачите и преработувачите ќе продолжи и во наредниот период.
