По жестоките ракетирања на САД и Израел врз Иран, цените на нафтата на берзите значително пораснаа. Американската сурова нафта за околу 8% до 72 долари по барел, а цената референтната нафта Brent за повеќе од 12% до 82 долари.
Ваквиот бран на раст на цените беше очекуван и пред нападите, но сега се зголемува неизвесност околу обемот и траењето на конфликтот откако се гледа дека Иран не попушта.
Клучен фактор е Ормутскиот теснец, преку кој секојдневно поминува околу 20 милиони барели нафта, што е приближно петтина од дневниот глобален извоз. Токму тој премин е контролиран од Иран и во моментов е затворен, а за поминување чекаат повеќе од 150 танкери.
Предупредувањата се дека, ако дојде до долготраен прекин на транспортот преку теснецот или сериозни напади врз производствените капацитети, цените на нафтата би можеле да се искачат и над 100 долари по барел. Тоа би можело да предизвика сериозен раст на цените на горивата на бензинските пумпи.
