Во населбата Козле официјално започна изградбата на новата детска градинка „Пролет“, проект со кој ќе се обезбедат дополнителни капацитети за згрижување на најмладите жители на Општина Карпош.
На означувањето на почетокот на градежните работи присуствуваа премиерот Христијан Мицкоски, министерот за социјална политика, демографија и млади Фатмир Лимани и заменик-градоначалникот на Општина Карпош, Неделчо Крстевски.
Новата градинка ќе се простира на 1.150 квадратни метри, на парцела со вкупна површина од 2.000 квадратни метри. Објектот ќе располага со седум занимални и ќе има капацитет за згрижување на 130 деца.
Според Крстевски, предвидениот рок за изградба е 120 дена, а очекувањата се градинката да биде ставена во функција пред почетокот на зимата.
Премиерот Мицкоски истакна дека инвестициите во објекти за најмладите се меѓу приоритетите и нагласи дека новата градинка ќе обезбеди современи услови за учење, игра и дружење, како и сигурност за родителите.
Министерот Лимани порача дека вложувањето во предучилишното образование е вложување во иднината на државата. Тој истакна дека целта на Министерството е секое дете да има пристап до квалитетна грижа и безбедна средина, а Владата продолжува со проширување на капацитетите за намалување на листите на чекање.
Лимани најави дека до крајот на оваа или во текот на следната година ќе бидат отворени повеќе градинки кои се во фаза на изградба, со што ќе се обезбедат околу 3.500 нови места за згрижување на деца.
