Државјанин на Мексико е приведен откако за време на јавна манифестација во скопската населба Ѓорче Петров физички нападнал полициски службеник, соопшти Министерството за внатрешни работи.
Според информациите, инцидентот се случил на 19 септември околу 21 часот во паркот во Ѓорче Петров, каде се одржувала манифестација. Полициски службеници од СВР Скопје го лишиле од слобода Х.И.Б.Л. (31) од Мексико, откако тој одбил да се легитимира и се однесувал агресивно.
Како што наведуваат од МВР, тој потоа физички нападнал полициски службеник и употребил тврд предмет додека полицаецот извршувал службени дејствија.
При проверките било утврдено дека странскиот државјанин бил под дејство на алкохол, при што му биле измерени 2,30 промили алкохол во крвта.
Од Министерството за внатрешни работи информираат дека по целосното документирање на случајот против него ќе биде поднесена соодветна пријава.
