Војната со Иран досега ги чинела Соединетите Американски Држави најмалку 48,3 милијарди долари, покажуваат најновите податоци презентирани во американскиот Сенат. Сепак, законодавците предупредуваат дека вистинската цена на конфликтот би можела да биде значително повисока, бидејќи во официјалната сума не се вклучени штетите што иранските напади ги предизвикале врз американските воени бази на Блискиот Исток.
Податоците пред Комисијата за вооружените сили на Сенатот ги презентираше Артур Милер, претставник на Пентагон задолжен за буџетските прашања, во рамки на расправата за неговото именување за финансиски контролор на американската Воена морнарица.
Според Милер, проценетите 48,3 милијарди долари ги опфаќаат трошоците за воените операции, замената на уништената или оштетената опрема, како и набавката на нова муниција и вооружување искористени во текот на конфликтот.
Меѓутоа, кога демократскиот сенатор Ричард Блументал побара проценка за материјалната штета што Иран ја предизвикал врз американските воени објекти, Милер одговорил дека Пентагон во моментов нема подготвено такви бројки.
Тоа предизвика реакција и од претседателот на Комисијата за вооружени сили, републиканскиот сенатор Роџер Викер, кој побара од Пентагон во најкус можен рок да достави дополнителни информации за реалните финансиски последици од иранските напади.
Според проценките на светските агенции, во нападите биле погодени хангари за воени авиони, системи за рано предупредување од ракетни напади, магацини за оружје, сместувачки капацитети за американскиот воен персонал, како и други стратешки објекти во американските бази на Блискиот Исток. Штетата на дел од воената опрема се проценува на повеќе милијарди долари.
Финансиската цена на војната стана едно од најконтроверзните прашања во американскиот Конгрес, особено во период кога администрацијата на претседателот Доналд Трамп бара од законодавците да одобрат рекорден одбранбен буџет од 1,5 трилиони долари.
Дополнителен притисок создава и фактот што војната станува сè понепопуларна кај американската јавност, а нејзините економски последици веќе се чувствуваат врз федералниот буџет. Аналитичарите оценуваат дека токму трошоците за конфликтот придонеле и за изборните загуби на републиканците на последните меѓуизбори.
Се очекува расправите околу финансирањето на војната дополнително да се интензивираат откако демократите во јануари ќе ја преземат контролата врз Конгресот, при што едно од нивните главни барања ќе биде целосна транспарентност за вистинската цена на конфликтот.
Во меѓувреме, демократската сенаторка Елизабет Ворен изјави дека американската поморска блокада на иранскиот поморски сообраќај чини околу 32,5 милиони долари дневно. Таа, повикувајќи се на независни анализи и медиумски извештаи, наведе и дека само штетата од иранскиот напад врз регионалниот штаб на американската Воена морнарица во Бахреин се проценува на најмалку 400 милиони долари.
Додека Пентагон ги сумира трошоците од конфликтот, во Конгресот расте притисокот американската јавност да добие целосна слика за финансиските последици од војната, вклучувајќи ги и директните штети врз американските воени капацитети.
