Пелистер го претстави петтото засилување за новата сезона

Кошаркарскиот клуб Пелистер продолжува со засилувањата за новата сезона, а петто ново име во тимот е Виктор Златевски.

Битолскиот прволигаш потврди дека со 25-годишниот бек е потпишан едногодишен договор, а тој ќе му се приклучи на тимот на стартот од подготовките за сезоната 2026/27.

Златевски во Пелистер пристигнува од Феникс 2010, а во својата кариера настапуваше и за Гостивар, Работнички и ФМП Академија. Во младинските категории беше дел и од репрезентацијата на Македонија до 18 години.

Во изминатата сезона бележеше просек од 10,7 поени, 1,6 скока и 2,6 асистенции по натпревар, а во Пелистер се очекува да биде значајно засилување во бековската линија.