Бугарија денеска гласа на претседателски избори, на кои право на глас имаат околу 6,59 милиони граѓани. Избирачките места се отворени во 7 часот, а гласањето ќе трае до 20 часот, со можност да биде продолжено до 21 часот доколку пред избирачките места има граѓани кои чекаат да гласаат.
Во земјата се отворени 9.373 избирачки места, додека во странство гласањето се организира на уште 613 локации. Дел од избирачките места се опремени со машини за гласање, а вкупно се ставени во употреба 11.622 уреди.
Според предизборните анкети, најголема поддршка имаат три претседателски кандидатски двојки.
Актуелната претседателка Илијана Јотова и нејзиниот кандидат за потпретседател Кирил Валчев влегуваат во изборната трка како фаворити. Јотова ја презеде претседателската функција во јануари годинава, откако Румен Радев предвреме го заврши мандатот, а претходно два мандата беше потпретседателка на државата. Нивната кандидатура е поддржана од иницијативен комитет, како и од „Прогресивна Бугарија“ и Бугарската социјалистичка партија.
Во трката се и Андреј Ѓуров и Георги Кандев, кои настапуваат со поддршка од „Продолжуваме со промената“ и „Демократска Бугарија“. Тие во кампањата се фокусираа на владеењето на правото, независноста на институциите и безбедноста.
Кандидати се и лидерот на „Преродба“, Костадин Костадинов, и Петар Волгин. Нивната програма е насочена кон националниот суверенитет, независна надворешна политика и преиспитување на досегашниот евроатлантски курс на Бугарија.
Само два дена пред изборите, политичката атмосфера дополнително се вжешти по инцидентот во Софија, кога новинарката Соња Колтуклиева беше оттурната од припадник на обезбедувањето на претседателката на Народното собрание. Настанот се случи пред седиштето на владејачката партија „Прогресивна Бугарија“, по брифингот на премиерот Румен Радев.
Доколку ниту една кандидатска двојка не обезбеди доволно гласови за победа во првиот круг, вториот круг од претседателските избори ќе се одржи на 1 ноември.
