Полемиката околу преговарачката рамка со Европската Унија повторно ја вжешти политичката сцена, откако поранешниот министер за надворешни работи Бујар Османи повторно го објави своето видео во кое ја објаснува структурата на преговарачкиот процес и тврди дека прашањата поврзани со Бугарија не претставуваат пречка за евроинтеграциите на Македонија.
Во видеото, Османи на бела табла го објаснува процесот, наведувајќи дека преговарачката рамка се состои од општ и специјален дел.
„Општиот дел ги содржи одредниците за кои нема писмен извештај од Европската комисија, ниту гласање во Европскиот совет. Договорот со Бугарија и записниците од член 12 се токму во тој дел, па затоа не можат да бидат пречка на патот кон Европската Унија“, вели Османи.
Тој посочува дека специјалниот дел ги опфаќа 35-те преговарачки поглавја, а како единствена можна пречка го споменува Акцискиот план за малцинства, кој, според него, не се однесува на конкретно малцинство, туку на сите етнички и неетнички заедници.
На ваквите ставови реагираше министерот за надворешни работи и надворешна трговија Тимчо Муцунски, кој оцени дека Османи нема кредибилитет да говори за преговарачката рамка.
„Бујар Османи е последниот што има право да држи лекции за тоа што е прифатено, а што не. Тој многу добро знае што преговараше, што прифаќаше и во каква позиција ја остави државата. Наместо да ги извртува фактите, треба да покаже политичка одговорност“, порача Муцунски.
Во својата реакција тој се осврна и на изборните резултати на Османи, оценувајќи дека политичар кој не ја добил довербата од граѓаните нема легитимитет да дели лекции за државните политики.
Муцунски нагласи дека Владата останува на својата позиција во однос на евроинтеграциите и заштитата на националните интереси, додавајќи дека, според него, јавноста добро знае кој ја довел државата во сегашната ситуација во процесот на преговори со Европската Унија.
