Јавното претпријатие за државни патишта соопшти дека санацијата на мостот на Маркова Река е завршена пред предвидениот рок, поради што од утре, 5 септември 2026 година, мостот повторно ќе биде целосно пуштен во употреба.
Станува збор за мостот на регионалниот пат Р1106, кој го користат жителите на Кисела Вода, како и граѓаните што секојдневно патуваат кон Драчево, Зелениково, Батинци и околните населени места.
Во рамки на реконструкцијата беа изведени повеќе градежни зафати за подобрување на безбедноста и функционалноста на мостот. Отстранети беа старите дилатациони фуги, сливници, асфалт и тротоари, по што беше поставена нова бетонска плоча и хидроизолација. Дополнително, мостот доби нов асфалтен слој, нови тротоари со рабници и беше извршена санација на парапетната греда.
Од ЈПДП информираат дека работите се реализирале со забрзана динамика, прилагодена на летниот период кога интензитетот на сообраќајот е помал, со цел да се намалат застојот и непријатностите за возачите.
Градежните активности ги изведе компанијата „Синтек Инженеринг“ ДООЕЛ од село Бразда, додека надзорот го вршеше „ЕОС Е.Е.“ ДОО Скопје. Вредноста на проектот изнесува 4.619.800 денари без ДДВ, а средствата се обезбедени од буџетот на Јавното претпријатие за државни патишта.
Од претпријатието посочуваат дека континуирано се грижат за одржувањето и безбедноста на повеќе од 1.100 мостови на државната патна мрежа, со цел обезбедување сигурен и безбеден сообраќај за сите учесници.
