Од денеска стапува во сила нов режим за користење на зоната „Hug & Fly“ пред терминалната зграда на Меѓународниот аеродром Скопје. Возилата и натаму ќе можат бесплатно да се задржат до 10 минути за оставање или преземање патници, но оваа можност ќе може да се искористи само еднаш во период од 24 часа. Контролата ќе се врши преку систем за автоматско препознавање и евидентирање на регистарските таблички.
Од ТАВ Македонија велат дека целта е да се спречат злоупотребите, да се намали метежот пред терминалот и да се овозможи побрз проток на возила. За подолго задржување или повеќекратно доаѓање, возачите ќе можат да го користат главниот паркинг со 1.200 места, каде цената започнува од 100 денари за престој до еден час.
Новото правило предизвика реакции кај дел од такси-превозниците, кои предупредуваат дека поради повеќекратните дневни доаѓања на аеродромот ќе имаат дополнителни трошоци. Од ТАВ Македонија остануваат на ставот дека ограничувањето е потребно за подобро управување со сообраќајот пред терминалната зграда.
