Пет украински региони останаа без електрична енергија по новиот бран масовни руски напади врз енергетската инфраструктура, соопшти украинското Министерство за енергетика.
Без струја останаа делови од регионите Дњепропетровск, Доњецк, Киев, Житомир и Харков, каде што, според украинските власти, се оштетени преносните и дистрибутивните електроенергетски мрежи. Засега не е соопштено колку домаќинства се погодени од прекините во снабдувањето.
Министерството наведува дека санацијата на дефектите се одвива отежнато поради честите воздушни тревоги и безбедносната состојба на теренот.
Украинскиот претседател Володимир Зеленски изјави дека Русија во комбинираниот напад употребила 36 балистички ракети и 172 беспилотни летала. Напади биле регистрирани во десетина украински региони, при што, според официјалните информации, загинале најмалку девет лица, меѓу кои и едно дете.
Во нападите повторно бил оштетен и Северниот мост во Киев, една од клучните сообраќајни врски преку реката Дњепар, поради што властите привремено го затвориле за сообраќај.
Руското Министерство за одбрана потврди дека мостот бил цел на напад, тврдејќи дека се користел за транспорт на оружје, воена опрема и материјали за украинските вооружени сили.
Москва соопшти и дека извршила напад врз фабрика во Киев во која, според руските власти, се произведувале крстосувачки ракети од типот „Фламинго“, кои Украина неодамна почна да ги произведува и користи.
