Општина Центар започна со градежни активности за поставување нова водоводна и фекална канализациска мрежа на улиците „Анте Хаџи Митков“ и „Кеј 13 Ноември“ во населбата Маџир Маало.
Од општината информираат дека со овој проект се прошируваат капацитетите на системите за водоснабдување и одведување на отпадните води, со што се обезбедува подобра инфраструктура за жителите на оваа населба.
„Станува збор за целосно нова инфраструктура, која ќе овозможи поефикасно и постабилно водоснабдување на околу 200 жители на населбата, како и подобро одведување на отпадните води. Вкупната должина на новите цевководи изнесува 127 метри“, соопштија од Општина Центар.
Градоначалникот на Општина Центар, Горан Герасимовски, истакна дека проектот е дел од активностите за подобрување на комуналната инфраструктура и создавање подобри услови за граѓаните.
„Со овој проект, жителите на Маџир Маало добиваат современо и сигурно водоснабдување и трајно решение за одведување на фекалните води“, изјави Герасимовски.
Од Општината посочуваат дека продолжуваат со реализација на инфраструктурни проекти насочени кон подобрување на квалитетот на живот и модернизирање на урбаната инфраструктура.
