Рудниците Злетово и Тораница ќе влезат во нов развоен циклус во 2026 и 2027 година со амбициозна инвестициона програма, најави операторот „Булмак 2016“. Целта е да се зајакне рударската активност, да се модернизира производството и да се обезбеди долгорочна стабилност на рудниците.
„Првиот столб на инвестициите е насочен кон детални геолошки и рударски истражувања за утврдување на нови рудни резерви. Ова ќе обезбеди поефикасно искористување на ресурсите и континуитет во производството за наредните децении,“ изјави директорот Тони Тоневски.
Во рамки на програмата се предвидени и изградба на современо јаловиште во Тораница, набавка на нова рударска механизација, модернизација на транспортните рампи и флотациските постројки, како и воведување современи геофизички испитувања. Со тоа, компанијата ќе обезбеди поголема продуктивност, пониски трошоци, повисока безбедност на работниците и усогласување со највисоките еколошки стандарди.
„Булмак 2016“ ја гледа иднината на рудниците не само во рудното богатство, туку и во довербата на локалните заедници и јавноста. Со овие вложувања, Злетово и Тораница треба да продолжат да бидат двигатели на локалниот развој и стабилни рударски центри со сигурна иднина.
