Со кредит од 40 милиони евра од домашните банки, со државна гаранција Јавното претпријатие за државни патишта ќе ги финансира преземени обврски и ќе рефинансира долгови поврзани со капитални проекти и инвестиции.
Новото задолжување е кај Комерцијална банка и Халк банка преку синдициран кредит во износ од 2,46 милијарди денари, ќе се отплаќа осум години, со грејс-период од три години, а средствата треба да бидат повлечени најдоцна до 31 декември 2026 година.
Договорената каматна стапка е референтната стапка зголемена за маржа од 1,55 процентни поени, со дополнителни услови утврдени во договорот.
Новиот кредит, е трето задолжување на претпријатието, одобрено од владата за нешто повеќе од два месеци, во вкупна вредност од околу 356 милиони евра. Претходните две се за изградба на делници од автопатот што го гради Бехтел и Енка и за автопатот Кичево – Охрид.
