Вицепремиерот и министер за транспорт Александар Николоски на бизнис форумот во Стопанската комора порача дека непречениот проток на стоки е еден од клучните предуслови за економски развој и поголема конкурентност на компаниите.
Тој истакна дека е неопходно да се отстранат административните и останатите пречки кои предизвикуваат застои на транспортните коридори, како и значително да се намалат времето на чекање и задржувањата на превозниците.
Осврнувајќи се на европските инфраструктурни проекти, Николоски посочи дека компаниите од Европската Унија се соочуваат со силна конкуренција од фирми од земји надвор од Унијата, при што, според него, значителен дел од големите тендери ги добиваат компании од Кина и Индија.
Според него, средствата што ги обезбедуваат европските даночни обврзници треба во поголема мера да остануваат во европската економија и преку реализацијата на проектите повторно да се враќаат во стопанството на земјите членки.
Николоски оцени дека обезбедувањето еднакви услови за конкуренција, заедно со отстранувањето на бариерите во транспортот, се клучни за подобрување на деловната клима и зајакнување на конкурентноста на европската економија.
„Мислам дека разговараме за апсурд. Во 21 век, со признати либерализации со земја кандидат за членство во Европската Унија која ги почна преговорите, да разговараме дали македонски превозник треба кога ќе се качи во камион да ги брои деновите, часовите и минутите. Ако имаме нелојална конкуренција од една страна, а немаме слободен проток на стока и добра, тогаш нема поента за било што да разговараме. И обратно, ако ги решиме овие два проблема, тогаш можностите се огромни“, изјави Николоски.
