Mногу делови од Европа денеска се погодени со снег, замрзнат дожд и многу ниски температури, а сообраќајот во голем број градови во неколку земји е или отежнат или целосно прекинат.
Голема количина снег падна и во Холандија, а аеродромот „Шипхол“ во Амстердам поради тоа откажа околу 400 летови, додека други авиони чекаат пистите да бидат одмрзнати и исчистени. Во Холандија, железничкиот сообраќај изутрината беше во прекин, а националната железничка компанија NS ги информираше патниците да „патуваат само доколку тоа е апсолутно неопходно“. На некои автопати, поради снегот и мразот се формираат долги колони возила.
Во Франција, според официјални претставници од повеќе делови од земјата, пет лица загинаа во сообраќајки, властите наредија камионите да се тргнат од патиштата, а некои училишта во Париз беа затворени поради снегот. Шест аеродроми на север и запад од Франција беа затворени поради обилни врнежи од дожд, додека стотици летови беа откажани на аеродромите низ целиот регион.
Студено време се очекува и во Велика Британија, каде што поради снегот е нарушен и железничкиот, патниот и воздушниот сообраќај, а стотици училишта се затворени.
Дел од светските агенции јавуваат и за обилни дождови на Балканот, а се наведува дека снегот и дождот создале големи проблеми во сообраќајот и во снабдувањето со електрична енергија и вода.
