Светската здравствена организација побара дополнителни информации од Русија по мистериозната смрт на 28-годишната научничка Дарја Шипилова, вработена во институт за истражување на чумата во сибирскиот град Иркутск. Младата жена починала само два дена откако почувствувала симптоми слични на настинка, а во јавноста се појавија сомнежи дека можеби се заразила со белодробна чума при лабораториски инцидент.
Руските власти ги отфрлаат ваквите тврдења и соопштија дека причината за смртта е воспаление на белите дробови со непознато потекло. Сепак, во институтот и во околните болници биле воведени строги карантински мерки, а дел од вработените три дена останале затворени во објектот додека траеле тестирањата.
Генералниот директор на СЗО, Тедрос Аданом Гебрејесус, изјави дека организацијата сè уште нема целосни информации за настанот и не може да направи сеопфатна процена на здравствениот ризик. Дополнителна загриженост предизвикаа непотврдените информации за уште еден вработен во институтот кој наводно има воспаление на белите дробови со непозната причина.
СЗО бара од Москва транспарентно да ги достави резултатите од испитувањата, додека руските здравствени власти уверуваат дека нема потврдени случаи на чума и дека епидемиолошката состојба е стабилна. Случајот предизвика меѓународно внимание, а американскиот претседател Доналд Трамп најави можен разговор со Владимир Путин, додека здравствените институции продолжуваат да ги проверуваат околностите околу смртта на научничката.
