Градоначалникот на Скопје, Орце Ѓорѓиевски, најави дека наскоро ќе започне асфалтирањето на булеварот „Борис Трајковски“, кој со години е предмет на најави и ветувања.
„Зборот е збор – за скоро од денес започнуваме со асфалтирање на булеварот „Борис Трајковски“!“, напиша Ѓорѓиевски на својот профил на Фејсбук.
Тој посочува дека по повеќедецениски најави, во изминатите нешто повеќе од три месеци биле решени проблемите кои ја попречувале реализацијата на проектот и предизвикувале сериозни сообраќајни проблеми за жителите на овој дел од Скопје.
Според Ѓорѓиевски, трасата на булеварот сега е целосно ослободена, изградена е нова атмосферска канализација, а завршено е и тампонирањето на едната страна од трасата.
Следниот чекор, како што најавува скопскиот градоначалник, е поставување на првиот слој асфалт, со што проектот ќе влезе во нова фаза на реализација.
„По три децении празни ветувања, за само нешто повеќе од три месеци ги решивме проблемите што ја кочеа изградбата на булеварот „Борис Трајковски“ и секојдневно создаваа вистинска голгота за повеќе од 100.000 граѓани“, наведува Ѓорѓиевски.
Тој додава дека со реализацијата на проектот жителите на овој дел од главниот град ќе добијат нов, модерен и побезбеден булевар, кој треба да придонесе за подобрување на сообраќајот и условите за движење.
„Ветивме и реализираме! Жителите од овој дел на Скопје ќе добијат нов, модерен и безбеден булевар каков што одамна заслужуваат. Кога се сака – сѐ се може! Скопје го правиме заедно!“, порача градоначалникот.
