Ново истражување открива која држава е најсреќното место за иселениците и најдобра дестинација за воспитување деца. Анализата опфаќа низа фактори, меѓу кои стапката на криминал, квалитетот на здравствената заштита, образованието и просечните приходи.
Секоја година милиони луѓе ја напуштаат својата татковина во потрага по подобар и посигурен живот. Дел од нив бараат помала корупција, подобри услови за работа или поквалитетна животна средина, додека други се водат од желбата за посреќно детство за своите деца. Според најновото истражување, Норвешка се издвојува како најдобар избор за семејствата што се селат и како најсреќна дестинација за иселениците.
Истражувањето е спроведено од компанијата за миграција „Умзуг-365“ и вклучува анализа на 20 различни параметри. Норвешка го зазела првото место со вкупна оценка од 71,73 од можни 100 поени.
Резултатите ја потврдуваат сликата за висок животен стандард. Дури 94 проценти од семејствата што живеат во Норвешка изјавиле дека се задоволни од својот живот, што е значително над европскиот просек од 84,7 проценти.
Земјата се истакнува и со исклучителен квалитет на здравствената заштита. Стапката на смртност кај мајките изнесува 1,31 на 100.000 живородени деца, што е за 81 процент пониско од европскиот просек. Истовремено, детската смртност до 15-годишна возраст е меѓу најниските во Европа, што дополнително ја зголемува сигурноста кај родителите.
Просечниот животен век во Норвешка изнесува 83,3 години, што е значително над европскиот просек од 80,5 години. Според Светскиот извештај за среќа од минатата година, земјата е рангирана на седмото место во светот, што укажува на долгорочна и стабилна политика насочена кон квалитетот на животот.
На глобалната листа, Финска го зазема првото место, по што следуваат Данска, Исланд и Шведска, со што нордиските земји ја потврдуваат доминацијата како најпожелни дестинации за живот и одгледување деца. Обединетото Кралство е на 23-то место, додека САД паднаа на 24-то, најниско рангирање досега. Израел е осми и покрај безбедносните предизвици.
На дното на листата повторно се најде Авганистан, по што следуваат Сиера Леоне, Либан, Малави и Зимбабве. Македонија, според извештајот за 2025 година, е рангирана на 86-то место. Во регионот, Србија е 31-ва, Босна и Херцеговина 56-та, Хрватска 72-ра, а Словенија се најде на високото 19-то место.
