Најмалку осум лица загинаа, а десетици други беа повредени во серија пукотници што се случија во неколку американски градови за време на викендот кога се одбележуваше Ноќта на вештерките.
Најголем број жртви има во Далас, во сојузната држава Тексас, каде што во три одделни пукотници загинаа четири лица, а 15 беа повредени. Инцидентите се случиле во населбата Дип Елум, позната по бројните барови, ресторани и ноќни клубови.
Според полицијата, трите пукотници се случиле во раните утрински часови, во период од околу еден час и 15 минути. Шефот на полицијата во Далас, Даниел Комо, изјави дека истрагата продолжува и дека засега не е потврдено дали нападите се меѓусебно поврзани.
Безбедносните служби во повеќе американски градови сè уште трагаат по осомничени и се обидуваат да ги утврдат мотивите за нападите, кои најчесто се случиле во области со интензивен ноќен живот и голем број собири за празникот.
Во Џексон, главниот град на Мисисипи, две лица загинаа, а шест беа повредени во пукотница за време на забава за Ноќта на вештерките. Според полицијата, двајца маскирани мажи влегле во ноќен клуб, по што еден од нив отворил оган кон присутните. Загинале 20-годишен маж и 18-годишна девојка, а напаѓачите сè уште не се идентификувани.
„Никој не треба да се плаши за својот живот додека ужива во ноќен излез“, изјави градоначалникот на Џексон, Џон Хорн.
Пукотница имаше и во Блумингтон, универзитетски град во Индијана, каде што седум лица беа ранети во близина на кампусот на Универзитетот Индијана. Полицијата соопшти дека засега нема информации дека меѓу повредените има студенти.
Градоначалничката на Блумингтон, Кери Томсон, порача дека насилството е неприфатливо и дека ниту едно место не може целосно да биде заштитено од поединци подготвени да употребат оружје.
Во текот на викендот пукотници биле пријавени и во Фејетвил во Арканзас, Њуарк во Делавер и Блумингтон во Илиноис.
Иако празничниот викенд беше обележан со серија тешки инциденти, официјалните статистики покажуваат дека насилниот криминал во САД бележи пад во последниот период. Според податоците на ФБИ, минатата година стапката на убиства се намалила за 18 отсто, а вкупниот број насилни кривични дела за 9,3 отсто во споредба со претходната година.
Истражувањата покажуваат дека пукотниците во САД почесто се случуваат во ноќните часови, за време на викендите и во периоди на празнични прослави.
