Бројот на загинати во катастрофалните поплави на границата меѓу Непал и Кина се искачи на повеќе од 600, соопшти непалската полиција. Околу 2.500 луѓе сè уште се водат како исчезнати, меѓу кои има и странски државјани, додека истекува критичниот 72-часовен период во кој шансите за пронаоѓање преживеани се најголеми.
Кинеските државни медиуми објавија дека засега нема знаци дека некој преживеал на граничниот премин кој директно бил погоден од огромниот поплавен бран. Во Непал здравствените власти предупредуваат дека итна помош им е потребна на жителите на цело село за кое се стравува дека било однесено од водата.
Спасувачките операции дополнително ги отежнува најавата за нови врнежи во текот на викендот во веќе погодените подрачја. Властите внимателно го следат и новоформираното езеро поради опасност од негово пробивање и предизвикување уште еден поплавен бран. Во Катманду семејства на исчезнатите ја поминаа ноќта пред Универзитетската наставна болница, каде што според последните информации се лекуваат 31 преживеан. Роднините поставуваат фотографии и телефонски броеви пред болниците во надеж дека ќе добијат информација за своите најблиски, додека шансите за пронаоѓање нови преживеани стануваат сè помали.
