Пратеникот и член на Извршниот комитет на ВМРО-ДПМНЕ, Антонио Милошоски, оцени дека Македонија има добра меѓународна позиција и може да води избалансирана надворешна политика, која ќе ги зачува стратешките односи со САД и ќе ги зајакне врските со Европската Унија и државите од регионот.
Гостувајќи во емисијата „Надворешна – Светот во дијалог“ на МРТ, Милошоски посочи дека стратешкото партнерство со САД, како и политичката, економската и културната поврзаност со ЕУ и соседните земји, се важни фактори за позицијата на државата.
„Јас мислам дека Македонија е добро позиционирана и по однос на стратешкото партнерство со САД и по однос на нашата политичка, економска, културна и континентална поврзаност со ЕУ и со земјите од регионот“, изјави Милошоски.
Тој нагласи дека односите меѓу Европа и САД треба да се гледаат како меѓусебно поврзани, оценувајќи дека европскиот развој и безбедноста во изминатите децении се потпираат и на американската поддршка.
„Европскиот економски успех и демократија не би биле толку напредни без американската стабилност и безбедносна поддршка во изминативе 60 години“, рече Милошоски.
Според него, Македонија може паралелно да го продлабочува стратешкото партнерство со САД преку дијалогот за стратешко партнерство, но и да ги развива политичките и економските односи со европските партнери, меѓу кои ги спомена Германија, Австрија, Италија, Хрватска и Словенија.
Милошоски посочи и дека Македонија има високо ниво на усогласеност со надворешната и безбедносната политика на Европската Унија, што, според него, се гледа и преку гласањата во Обединетите нации во периодот од 2024 до 2026 година.
Тој наведе дека во случаи кога ЕУ има заеднички став за одредени прашања, Македонија го следи тој став, додавајќи дека статистиката за гласањето по резолуции, декларации и други акти покажува висока усогласеност со европската политика.
