Премиерот Христијан Мицкоски по средбата на лидерите од Западен Балкан со високата претставничка на Европската Унија за надворешна и безбедносна политика, Каја Калас, порача дека Брисел треба побрзо да испорача конкретни придобивки за граѓаните од регионот.
Во интервју за МРТ1, Мицкоски изјави дека на состанокот почувствувал враќање на теми и тензии кои потсетуваат на периодот од почетокот на деведесеттите години.
Според него, особено загрижува фактот што одредени настани и несогласувања можат повторно да предизвикаат сериозни поделби и нестабилност во регионот.
„Ме изненадува фактот што една работа може да го запали целиот регион. Нешто што од наша перспектива можеби не изгледа толку големо, очигледно може да предизвика сериозни тензии, а тие тензии можат да прераснат во конфликт“, рече Мицкоски.
Тој посочи дека на средбата со Каја Калас укажал дека граѓаните од Западен Балкан очекуваат побрзи и видливи резултати од Европската Унија.
Според него, конкретните мерки што би имале директно влијание врз секојдневниот живот на луѓето можат да помогнат во намалување на незадоволството и фрустрациите во регионот.
Како примери за такви чекори, премиерот ги посочи решавањето на проблемите со кои се соочуваат превозниците, како и воведувањето на принципот „Роум ет хоум“ (Roam at Home), со кој би се овозможил бесплатен роаминг за граѓаните од Западен Балкан во Европската Унија.
