Македонската економија во вториот квартал од годинава остварила реален раст од 4,3 проценти, додека градежниот сектор бележи раст од 21,9 проценти, изјави премиерот и лидер на ВМРО-ДПМНЕ, Христијан Мицкоски, на партискиот митинг во Брвеница.
Тој порача дека позитивните економски показатели треба во наредниот период да се претворат во конкретни придобивки за граѓаните.
„Растот мора да продолжи и резултатите повеќе да се чувствуваат – во повисоки плати во периодот што следи, во повеќе добро платени работни места, училишта, патишта, водоводи, канализации, здравствени установи и јавни услуги што функционираат“, рече Мицкоски.
Премиерот посочи дека продолжува растот на бруто-инвестициите, нагласувајќи дека главните економски приоритети на Владата остануваат отворање подобро платени работни места, привлекување инвестиции, развој на инфраструктурата, поддршка на домашните компании и зголемување на расположливиот доход на семејствата.
Мицкоски во обраќањето истакна дека од формирањето на актуелната Влада околу 500 милиони евра биле насочени кон проекти во општините, дел од кои биле реализирани и во Брвеница.
Тој најави дека се подготвува план за нов повик следната година, преку кој локалните самоуправи повторно ќе можат да аплицираат за финансирање на проекти.
