Комесарката за проширување на Европската унија, Марта Кос, ја откажа планираната посета на Србија поради, како што наведе, „величењето“ на Ратко Младиќ по неговата смрт.
Кос преку социјалните мрежи порача дека Младиќ бил осуден за геноцид, злосторства против човештвото и воени злосторства, додавајќи дека неговото враќање во Белград ја потсетува Европа на најтемните страници од поновата историја.
„Величањето што следи по неговата смрт е некомпатибилно со вредностите врз кои е изграден патот кон Европската унија. Тој пат бара соочување со минатото, вистинско помирување и почитување на жртвите на воените злосторства“, напиша европската комесарка.
Таа нагласи дека вредностите на кои се темели иднината на Европа не се предмет на преговори и дека поради актуелните случувања решила да не ја реализира најавената посета на Белград.
Кос во разговор со новинарите на неформалниот состанок на министрите за европски прашања во Даблин изјави дека начинот на кој ќе помине погребот на Младиќ ќе биде земен предвид при оценувањето на усогласеноста на Србија со надворешната и безбедносната политика на ЕУ.
Претседателот на Србија, Александар Вучиќ, реагираше на одлуката на Кос, оценувајќи дека образложението за откажувањето на посетата било „глупаво“.
„Величањето едноставно не кажува кој нешто величал. Кога не можат да најдат ништо конкретно, тогаш се занимаваат со тоа“, изјави Вучиќ.
Телото на Ратко Младиќ, кој почина во Хаг на 27 август на 85-годишна возраст, беше пренесено во Белград со авион на Владата на Србија.
Меѓународниот кривичен трибунал за поранешна Југославија го осуди Младиќ на доживотен затвор за геноцидот во Сребреница, теророт врз цивилното население во Сараево и други воени злосторства извршени за време на војната во Босна и Херцеговина.
При транспортот на ковчегот низ Белград беа забележани транспаренти со пораки за поддршка, а дел од граѓаните го поздравуваа неговото пристигнување. Најавена е комеморација, по што ќе следи погребување на гробиштата Топчидер.
На случувањата реагираше и комесарот за човекови права на Советот на Европа, Мајкл О’Флаерти, кој изрази згрозување од јавното величење на осуден воен злосторник, оценувајќи дека тоа претставува навреда за жртвите.
Случајот повторно ги отвори прашањата за соочувањето со военото наследство од 90-тите години, односот кон пресудите на меѓународните судови и европскиот пат на Србија.
