Женската ракометна репрезентација на Македонија со две победи и еден пораз го заврши настапот на традиционалниот меѓународен турнир „Трофеј Македонија 2026“, кој викендов се одржа во Охрид.
Турнирот во спортската сала „Билјанини извори“ беше дел од неделата на Европската ракометна федерација (ЕХФ), а воедно претставуваше и последна проверка за македонските ракометарки пред настапот на Европското првенство.
Избраничките на новиот селектор Игор Марковиќ прикажаа одлични изданија и завршија на второто место во конкуренција на четири репрезентации.
Победничкиот трофеј го освои Црна Гора, која турнирот го заврши со максимален учинок од три победи. Третото место ѝ припадна на Хрватска, додека Србија беше четврта со три порази.
Македонија во првото коло славеше убедливо против Србија со 29:21, потоа загуби од Црна Гора со 23:29, а во последниот натпревар приреди мало изненадување совладувајќи ја Хрватска со 25:22.
Сите четири селекции од турнирот ќе настапат на претстојното Европско првенство. Македонија ќе биде дел од групата Б, каде ќе игра против Норвешка, Романија и Швајцарија.
На индивидуален план, најдобар стрелец на „Трофеј Македонија 2026“ беше македонското десно крило Сара Ристовска, која по враќањето во репрезентацијата постигна вкупно 22 гола.
За најкорисна ракометарка на турнирот беше прогласена Ивана Савиќ од Црна Гора, додека признанието за најдобра голманка го доби Луција Бешен од Хрватска.
