Министерката за енергетика, рударство и минерални суровини Сања Божиновска информираше дека со техничка поддршка од Европската Унија успешно е завршена првата сеопфатна Водородна студија за Македонија.
Според Божиновска, студијата ги анализира можностите за производство, транспорт, складирање и употреба на зелен водород, при што е потврдено дека земјата располага со реален потенцијал за активно вклучување во идната европска водородна инфраструктура.
„Со овој стратешки документ, Македонија се вбројува меѓу првите земји во регионот кои веќе имаат национална визија за развој на водородниот сектор. Ова е значаен чекор кон енергетската транзиција, декарбонизацијата, привлекувањето нови инвестиции и обезбедувањето долгорочна енергетска сигурност“, истакна Божиновска.
Таа посочи дека развојот на водородниот сектор претставува можност за модернизација на енергетскиот систем и создавање нови економски перспективи, во согласност со европските политики за чиста енергија.
