Зголемената побарувачка за луксузни патувања е тесно поврзана со развојот на дестинации што се фокусираат на благосостојба и здрав начин на живот, особено популарни кај жените. Новиот бран на отворање луксузни хотели ширум светот, особено на Блискиот Исток, дополнително го поттикнува овој тренд.
Украинката Дарија Гурстримба, основач и директорка на лондонската компанија Globe7, нуди ултралуксузно и дискретно патување за најпребирливите клиенти. Компанијата има ексклузивни договори со повеќе од десет од најголемите светски хотелски синџири, работи на сите седум континенти и управува со резервации вредни десетици милиони долари годишно.
Globe7 користи алатки со вештачка интелигенција прилагодени на секој клиент и има партнерства со банки и крипто-платформи. Клиентелата вклучува семејни фондови со долга традиција, но и крипто милионери.
„Голем дел од промените во луксузните патувања денес ги водат жените. Многу од нив носат повеќе улоги и одговорности, често без одмор. За нив, самостојното патување е начин да се ресетираат, да здивнат и да се поврзат со она што навистина им е важно“, вели Гурстримба.
Нејзината кариера започнала во Данон Украина како маркетинг експерт за Актимел и Данисимо, по што продолжила како маркетинг-раководител за Украина и ЗНД во Биосфера, каде што постигнала раст на продажбата од над 40%. До 25 години веќе станала директорка за маркетинг — резултат на интензивна работа, образование и менторство. Подоцна се обидела со новинарство и организирање настани, што ја довело до нејзината вистинска страст — патувањето.
Гурстримба нагласува дека велнес патувањата и ретритите се во срцето на новиот тренд. Места како SHA Wellness Clinic, Six Senses Vana и La Prairie нудат идеална комбинација од структура и спокојство. Во Италија, Ермито станува препознатлив како современ манастир во шума, додека Малдивите со дестинации како Joali Being го нудат мирот на океанот, обновата на духот и чувството на изолирана смиреност што го бараат соло патничките.
Покрај тоа, искуства како The Ritz-Carlton Yacht Collection и Orient Express Sailing Yacht се наменети за оние кои уживаат во патување со бавно темпо, во удобна средина и меѓу истомисленици.
„За многу жени, оваа независност ја одразува реалноста на модерниот живот. Некои се сингл по избор, други се во врска или имаат кариера што бара многу. Заедничко им е стремежот кон рамнотежа и желбата за патување што носи внатрешна и надворешна трансформација“, додава таа.
Според Бријана Глен, сопственичка на Milk + Honey Travels, жените што патуваат сами живеат динамичен и исполнет живот — тие се лидери, претприемачи и лица кои се грижат за други. За нив, самостојното патување не е обичен одмор, туку враќање кон себе.
„Жените сакаат простор, тишина и убавина. Не сакаат да докажуваат ништо патувајќи сами — едноставно знаат дека кога никого не треба да задоволат, можат да се движат со сопствено темпо и да го слушаат својот внатрешен глас“, вели Глен.
Многу од тие патувања се поврзани со важни животни моменти — родендени, нови поглавја или тивки лични победи.
Најпопуларни дестинации за жени кои патуваат сами
Бријана издвојува четири врвни избори:
Португалија – градови идеални за пешачење, бутик хотели и врвна гастрономија.
Јапонија – мир, ред, минимализам и беспрекорна услуга.
Јужна Африка – комбинација од луксуз, природа, приватни сафари и вински региони.
Костарика – совршена за целосно велнес-ресетирање, со недопрена природа и врвни еко-луксузни одморалишта.
„Работам само со проверени партнери. Клиентите треба да се чувствуваат безбедно, згрижено и инспирирано — таа рамнотежа е клучна“, додава Глен.
