Љупчо Пецов доби условна казна затвор во траење од две години, откако ја признал вината во постапката што се водела против него. Пресудата е правосилна од 21 септември 2026 година, бидејќи ниту една од странките не поднела жалба, информираат од Основниот кривичен суд.
Одлуката била донесена на 24 август врз основа на признанието на обвинетиот. Судот утврдил казна затвор од две години, која нема да се изврши доколку Пецов во наредните пет години не стори ново кривично дело.
Покрај условната казна, му е изречена и парична казна во износ од 8.000 евра.
Судот му изрекол и мерка на забрана за вршење дејност како основач или управител на правно лице, односно забрана да управува, раководи или располага со имот на правно лице во период од десет години.
Казнета е и компанијата ДУТУД А.К.А.П. ДООЕЛ, која е во стечајна постапка. На правното лице му е изречена парична казна од еден милион денари, како и повеќе заштитни мерки.
Меѓу нив се забрана за добивање дозволи, лиценци и концесии утврдени со закон, забрана за учество во постапки по јавен повик, како и забрана за основање нови правни лица. Овие мерки ќе важат во наредните пет години.
Од Кривичниот суд наведуваат дека при одмерувањето на санкцијата било земено предвид и начелото на еднаков третман во однос на останатите обвинети во истиот предмет. Според судот, дел од нив исто така ја признале вината, ја надоместиле причинетата штета и во издвоени постапки добиле алтернативни санкции.
