Политичката партија Левица упати остри критики до Владата во врска со организацијата на прославата по повод јубилејот од независноста, оценувајќи дека објаснувањата на власта не успеваат да ги отстранат сомнежите околу спроведената постапка.
Од партијата велат дека начинот на кој бил избран организаторот, како и кратките рокови во процесот, отвораат прашања за транспарентноста и регуларноста на целата постапка.
Според Левица, особено спорен е периодот од завршувањето на јавниот повик до јавното претставување на програмата со настапот на светската музичка ѕвезда Дејвид Гета.
„Во јавниот повик е наведено дека Комисијата ја спроведува постапката, врши евалуација, изготвува извештај со предлог за избор на најповолен понудувач и ги оценува квалитетот, иновативноста, продукциската вредност, јавниот интерес, техничката подготвеност и финансиската оправданост. Денес, пак, се тврди дека нејзината улога била само проверка на комплетноста на документите“, наведуваат од Левица.
Партијата дополнително посочува и на можен судир на интереси поврзан со претседателот на Комисијата, Николче Мицевски, поради неговата поврзаност со дел од програмата на прославата, вклучително и концертот на Хозе Карерас.
Од Левица велат дека изјавите за претходни преговори околу овој проект се спротивни на тврдењата дека за време на евалуацијата не постоела информација за идниот ангажман, поради што бараат целосно расчистување на хронологијата на настаните.
Партијата бара Владата да ја објави целокупната документација поврзана со постапката, вклучително извештајот на Комисијата, записниците од нејзината работа, евентуалните индивидуални оценки, образложенијата за критериумите, одлуката за избор и временската линија од поднесувањето на понудата до официјалната најава на програмата.
Според Левица, само со целосна транспарентност јавноста може да добие одговор дали навистина имало детална евалуација или постапката била само формално спроведена.
