Левица ја повика Владата и министерот за надворешни работи Тимчо Муцунски да дадат објаснување за најавите околу можните промени во американската визна политика, оценувајќи дека ветувањата дадени на почетокот на годината не се реализирани.
Од партијата потсетуваат дека Муцунски во јануари изјавил дека македонските граѓани во наредните шест месеци може да очекуваат „позитивно изненадување“ поврзано со визниот режим на САД. Според Левица, рокот веќе е изминат, а Министерството за надворешни работи и Владата досега не ја информирале јавноста за евентуален напредок.
Во соопштението, Левица наведува дека Македонија и натаму се наоѓа на листата на земји за кои, според нивните тврдења, важат ограничувања во процесот на издавање иселенички визи за САД, оценувајќи дека надворешната политика на Владата не ги дала очекуваните резултати.
Партијата бара министерот Муцунски да ја информира јавноста до каде е процесот на разговори со американските власти и што се случило со најавените промени.
Од Левица додаваат дека доколку не биде дадено објаснување, тоа ќе биде потврда дека најавите биле дадени со цел да се ублажат реакциите во јавноста по одлуката на американските власти.
Воедно, од партијата оценуваат дека министерот поставил рок кој не бил исполнет и дека во иднина треба повнимателно да дава јавни ветувања поврзани со одлуки на странски институции.
