Кремастите десерти во чаша се идеален избор во текот на пролетта и летото, бидејќи нудат освежителна комбинација од лесна сладост и овошна свежина. Освен што се брзи и едноставни за подготовка, тие изгледаат декоративно и како да се подготвени во слаткарница, па можат да ги направат и почетници во кујната.
За овошниот дел потребни се 300 грама јагоди, две лажици шеќер во прав и една лажица густин.
За кремот се потребни 100 грама шеќер во прав, две лажици сок од лимон, една кесичка желатин, 200 милилитри шлаг и 350 милилитри јогурт.
Јагодите се мијат и се сечкаат, па се мешаат со шеќерот во прав и густинот. Смесата се блендира додека не стане мазна, а потоа се вари околу пет минути за да се згусне и се остава да се олади.
Во меѓувреме, желатинот се остава да набабри во ладна вода, по што се загрева додека целосно не се раствори. Јогуртот се меша со шеќерот и сокот од лимон, а потоа во него постепено се додава растопениот желатин.
Шлагот се мати додека не стане цврст и нежно се соединува со јогуртната смеса за да се задржи лесната и воздушеста текстура.
Чашите може претходно кратко да се навлажнат со ладна вода, по што се редат слоевите по желба. Десертот се остава да се излади во фрижидер, а по желба се декорира со свежи јагоди пред сервирање.
