Поднесена е кривична пријава против Марко Бислимовски, претседателот на Регулаторната комисија за енергетика. Тоа го сторила финансиската полиција поради сомнение дека ја злоупотребил службената положба и овластување, со што ѝ овозможил на една нафтена компанија незаконски да продолжи со работа повеќе од една година.
Според пријавата доставена до Основното јавно обвинителство Скопје, Бислимовски, иако бил законски обврзан, не покренал постапка за навремено одземање на лиценцата на компанијата „Тритерол Петрол ДООЕЛ Скопје”, која не ги исполнувала условите за вршење енергетска дејност. Финансиската полиција наведува дека благодарение на ова фирмата стекнала противправна имотна корист од околу 14,1 милиони денари.
Од Регулаторната комисија пак истакнаа дека во конкретниот случај за посочената фирма е постапено согласно Законот за енергетика и Правилникот за лиценци.
