Крајнодесничарската партија Алтернатива за Германија (АфД) достигна рекордни 28 проценти поддршка во најновата неделна анкета на ИНСА за гласачките намери, објавена вечерва. Со тоа ја зголеми предноста пред владејачките конзервативци на четири процентни поени.
Станува збор за највисок резултат на АфД досега во анкетите на ИНСА, со раст од еден процентен поен во однос на минатата недела. Конзервативната Христијанско-демократска унија (ЦДУ) на канцеларот Фридрих Мерц останува на 24 проценти, додека Зелените паднаа за еден поен на 12 проценти. Социјалдемократите (СПД) имаат стабилни 14 проценти, а Левицата останува на 11 проценти.
Бидејќи околу 11 проценти од гласовите одат кај партии што не би го поминале изборниот праг, за формирање влада би биле потребни најмалку 45 проценти меѓу партиите што влегуваат во парламентот.
Доколку остане исклучена можноста за соработка со АфД, најреални опции за влада би биле коалиции од три партии. Според анкетата, коалицијата на ЦДУ, СПД и Зелените би имала околу 50 проценти поддршка, додека комбинацијата на ЦДУ, СПД и Левицата би достигнала 49 проценти.
Анкетата на ИНСА е спроведена врз 1.203 испитаници во периодот од 20 до 24 април, со прашање како би гласале доколку федералните избори се одржат во недела.