Цените на нафтата денеска нагло пораснаа на меѓународните пазари, надминувајќи 83 долари за барел, поради продлабочувањето на конфликтот меѓу САД и Израел со Иран и намаленото производство во регионот на Персискиот Залив.
На лондонскиот пазар барел нафта попладне се тргуваше по 83,30 долари, што е за 5,56 долари повеќе во однос на претходното затворање. Во текот на денот цената достигна и 85,12 долари – највисоко ниво од јули 2024 година. На американскиот пазар барелот се продаваше по 76,52 долари, со раст од 5,29 долари, а привремено се искачи на 77,58 долари – највисоко ниво од јуни годинава.
Од затворањето на берзите во петокот, неколку часа пред нападите врз Иран, цената на барелот е зголемена за околу 16 до 17 проценти.
Ормутски теснец де факто е затворен, со што е блокирана речиси една петтина од глобалните испораки на нафта и течен природен гас. Иранските вооружени сили порачаа дека нема да дозволат извоз преку теснецот. Во меѓувреме, осигурителните компании го откажуваат покритието за бродови, поради што танкерите и контејнерските бродови го избегнуваат пловниот пат, а транспортните трошоци нагло растат.
Ирак го запре производството во нафтеното поле Румејла, второ по големина во светот, поради исполнети резервоари и неможност за транспорт. Се проценува дека таму се произведуваат околу 1,4 милиони барели дневно.
Во меѓувреме, Обединети Арапски Емирати се соочуваат со пожар во пристаништето Фуџаира по напад со дрон, додека Саудиска Арабија превентивно ја запре преработката во рафинеријата во Рас Танура. Катар, пак, го суспендираше производството на течен природен гас.
Аналитичарите од ING Group предупредуваат дека најголем ризик за пазарот претставуваат евентуални нови напади врз енергетската инфраструктура во регионот, што би можело да предизвика подолготрајни прекини во снабдувањето.
Според податоците на OPEC, цената на барел од нафтената кошница на организацијата во понеделникот пораснала за 8,24 долари и изнесувала 78,31 долари.
Енергетските пазари остануваат под силен притисок, а секоја нова ескалација во регионот дополнително ја зголемува неизвесноста и ризикот од нов раст на цените.
