Цените на становите во Македонија станаа неподносливо високи. Во Скопје веќе има станови и по цена од 2.600 евра по квадрат, па и повеќе.
Како младите ќе стекнат свој кров над главата и како ќе формираат семејства? Прашањето е многу сериозно и важно за развој на државата.
Не е ли време државните органи посериозно да излезат на терен по што ќе дадат одговор на дилемата – како дојде до тоа рапидно да скокне цената на стамбениот простор?
Инаку, добро е што пред еден месец Народна банка најави конкретни олеснувања за кредитирањето при купување или градење прво живеалиште, односно стан. Но дали тоа е доволно за решавање на проблемот?
Добро е што пред извесно време и Владата најави изградба на државни станови, што ќе се продаваат по поевтина цена. Но, се уште е неизвесно колку такви станови ќе има и дали тоа ќе успее да ги намали превисоките сегашни цени на стамбениот простор.
Во меѓувреме, со истиот проблем на превисоки цени се судрува и соседна Грција. Тамошната влада завчера најави дека во Атина, Солун и Патра ќе се изградат 1.500 до 1.700 станови за домаќинства со средни приходи. Се предлагаат и дополнителни решенија како државни гаранции и даночни олеснувања, како и попрогресивен данок за празни станови.
МОЖЕБИ ЌЕ ВЕ ИНТЕРЕСИРА: